အာ.ဗီ. ဧရာဝတီကွင်း နှင့် အလုပ်သင်အင်ဂျင်နီယာပေါက်စ ကျွန်တော်… အပိုင်း(၂)

အရင်အပိုင်းမှာတုန်းက ကျွန်တော် Project Management/Project Planning အကြောင်း သိသလောက်လေး ပြန်မျှဝေမယ်လို့ ပြောခဲ့တယ်နော်။ ကဲ… သိသမျှမှတ်သမျှ ပြန်ဝေငှပါပြီဗျာ။ Costing တစ်ခုတွက်မယ်ဆိုရင် Approach နှစ်မျိုးရှိပါတယ်။ တစ်မျိုးကတော့ ရှိပြီးသား ဒေတာ အဟောင်းတွေကနေခန့်မှန်းတဲ့ Estimate from Previous Data နဲ့ အမျိုးအစားအလိုက် ကဏ္ဍခွဲပြီး တွက်ချက်တဲ့ Categorizing ဆိုပြီး နှစ်မျိုးရှိပါတယ်။ နောက်တစ်ခုကတော့ သင်္ဘောဆောက်ဖို့ Inquiry ၁၀ ယောက်လောက် လာမေးရင် ၁ယောက်လောက်နဲ့ပဲ တကယ် အလုပ်ဖြစ်တာများပါတယ်။ ပြီးတော့ Cutting Edge အကြောင်း နဲနဲပြောသွားပါတယ်။

Planning … မြန်မာလိုဆိုရင်တော့ ကြိုတင်စီမံချက်ချတာပေါ့။ ဒီနေရာမှာတော့ အဓိကအားဖြင့် ၅မျိုးခွဲပါတယ်။

၁။ Define Tasks (ဘာတွေလုပ်ရမှာလဲ)

၂။ Schedule Tasks (ဘယ်အချိန်မှာ ဘာတွေပြီးရမလဲ)

၃။ Allocate Resources (အရင်းအမြစ်တွေကို ဘယ်လိုခွဲဝေသတ်မှတ်ပေးမှာလဲ)

ဒီမှာဆိုရင် Resources မှာ လူ့စွမ်းအားအရင်းအမြစ် (Human Resources), ကုန်ကြမ်း၊ ကုန်ပစ္စည်း အရင်းအမြစ် (Material Resources), သင်္ဘောကျင်းဝင်ဆံနိုင်မှုနှင့် လုပ်နိုင်စွမ်း (Dockyard Capacity and Resources) တွေကို ထည့်သွင်းစဉ်းစားရပါမယ်။

၄။ Calculate Costs (ကုန်ကျမည့် ငွေကြေးပမာဏကို တွက်ချက်ခြင်း)

၅။ Optimize the Schedule (လုပ်ငန်းစဉ်တစ်ခုလုံးကို ခြုံငုံပြီး အစီအစဉ် ကို သင့်တင့်မျှတအောင်ရေးဆွဲခြင်း)

တွေဟာ Planning လုပ်ဆောင်ချက်ထဲမှာ လုပ်ရမယ့်အဓိက ၅ချက်ပါ။

Project တစ်ခုစလုပ်မယ်ဆိုရင် သူ့လုပ်ငန်းစဉ်အလိုက် ဆိုင်ရာဆိုင်ရာ အလုပ်များကို ခွဲခြားပြီး အစီအစဉ်ဆွဲထားသင့်ပါတယ်။

ကျွန်တော်တို့ Ship Production မှာသင်ခဲ့တယ့် WBS (Work Breakdown Structure) ပေါ့။ ဒီမှာတော့

Top Level, 2. Work Packages, 3. Tasks ဆိုတာမျိုးပါ။

ခုနကပြောခဲ့တဲ့ Planning မှာတစ်ခုအပါအဝင်ဖြစ်တဲ့ Schedule Tasks မှာတော့ အချိန်ကို ဘယ်လိုခွဲဝေအသုံးချကြမယ်ဆိုတာကို အစီအစဉ်သတ်မှတ်ခြင်းဖြစ်ပါတယ်။ ဒါဟာProject တစ်ခုမှာ အသက်သမျှအရေးကြီးလှပါတယ်။ ဒါတွေကိုတော့ မြင်သာထင်သာရှိအောင် Schedule ရေးဆွဲခြင်း၊ GANTT Charts တွင်ဖော်ပြခြင်း၊ Milestone Charts များဆွဲခြင်း၊ Net Plans ->PERT (Program Evaluation and Review Technique) တွေနဲ့ သတ်မှတ်ဖော်ပြလေ့ရှိပါတယ်။

(Schedule ကတော့ နေ့စွဲတွေ၊ ရက်တွေနဲ့ ဘယ်နေ့ ဘယ်အချိန်မှာ ဘာပြီးအောင်လုပ်မယ်ကို မှတ်ထားတာမျိုးပါ)

  

(အပေါ်မှာပြထားတဲ့ ၄ပုံကတော့ GANTT Charts တွေပဲဖြစ်ပါတယ်။ ဒီမှာဆိုရင်တော့ ဘယ်အလုပ်နဲ့ဘယ်အလုပ်ကို တစ်ခါတည်းတွဲလုပ်လို့ရတယ်။ အချိန်ဘယ်လောက်ကြာရင်ပြီးမယ်။ ဒါပြီးတာနဲ့ ဟိုဟာတစ်ခါတည်းလုပ်မယ်။ ဒါမပြီးသေးလဲ ဟိုဟာကလုပ်ထားလို့ရတယ် ဆိုတာတွေကို Activities vs Time Taken နဲ့ ဆွဲထားတဲ့ Chart တွေပါ။)

(ဒါတွေကတော့ Milestone Charts ပါ)

ကျွန်တော်နားလည်သလောက်ပြန်ဝေငှတာပါ။ အမှားပါချင်လဲပါမယ်။ အမှားတွေ့ခဲ့ရင် ကျေးဇူးပြုပြီး Comment မှာရေးပြီး အမှားကို ထောက်ပြပေးခဲ့ပါ။

PERT ဆိုတာကတော့ Activities on Arrow Networks ပါ။

လုပ်ဆောင်ရမယ့် Activities တွေကို Arrows တွေမှာပြပြီး၊ ဖြစ်ပျက်မယ့် Events တွေကို Nodes တွေမှာရေးပါတယ်။

(ဒါတွေကတော့ PERT Charts တွေပါ။)

တစ်ခါတစ်ရံမှာတော့ Fish Bone Diagram, ငါးရိုးပုံစံနဲ့လည်း ပြလေ့ရှိပါတယ်။ ဒါကို Ishikawa Diagram လို့လည်းခေါ်ပါတယ်။ Planning မှာသုံးတာတော့ သိပ်မမြင်ဖူးဘူး။ Evaluation နဲ့ Cause-Effect  တွေရှာတဲ့နေရာမှာ ပိုသုံးတာတွေ့ရတယ်။

အသေးစိတ်သိချင်ရင်တော့ Google မှာ ရှာဖတ်လို့ရပါတယ်။

Project Planning/ Project Management မှာ နောက်ထပ်အသက်တမျှအရေးကြီးတာကတော့ Cost Calculation ပါပဲ။ ဟုတ်တာပေါ့၊ ရှုံးတာမြတ်တာ တွက်ထားရမှာပေါ့။ မတွက်ထားလို့ ခွက်ခွက်လန်အောင်ရှုံးရင် ဘာနဲ့ ထမင်းသွားစားကြမှာလဲ။

ဒီ Cost Calculations မှာ Influencing Factors တွေကတော့ အများကြီးပါပဲ။ ဒီ့အထဲမှာ Materials and Resources, Contracting, Subcontracting နဲ့ Inflation Factor တို့ကအရေးကြီးပါတယ်။ Materials and Resources မှာဆိုရင် Materials တွေအတွက်ကုန်ကျမယ့်ပိုက်ဆံတွေ၊ အလေအလွင့်တွေ၊ Resources မှာဆိုရင်လည်း အသုံးပြုရမယ့် လူအင်အားအတွက်ကုန်ကျစရိတ်၊ စက်ယန္တရားငှားရမ်းခတွေ ဒါတွေက Key Factors တွေလေ။ ဒါတွေ ထည့်မတွက်ထားမိလို့ ဘယ်ရမလဲ။ သောက်သောက်လဲရှုံးသွားမှာပေါ့။

Contracting နဲ့ Subcontracting ကတော့ ကျွန်တော်လဲသိပ်မသိတော့ မရေးတော့ဘူး။ Inflation Factor ကတော့ မေ့ကျန်ခဲ့လို့မဖြစ်ဘူး။ ဥပမာအနေနဲ့ ပြောရရင် မနှစ်က ကြက်ဥတစ်လုံးဘယ်လောက်လဲ၊ လက်ရှိဘယ်စျေးလဲ၊ နောက်နှစ်ဘယ်လောက်ဖြစ်မလဲ၊ နာဂစ်တုန်းက ကြက်ဥစျေးဘယ်လောက်အထိမြင့်တက်သွားလဲ။ ကြက်ငှက်တုတ်ကွေးဖြစ်တုန်းက ဘယ်လောက်အထိနိမ့်ဆင်းသွားလဲ။ ဒါတွေအကုန်သိရမယ်။ တွက်ထားရမယ်။ ကြက်ဥစျေးက ဒေါ်လာစျေးပေါ်တိုက်ရိုက်မှီခိုလား၊ ရွှေစျေးအတက်အကျနဲ့ရောဆိုင်လား၊ ဓါတ်ဆီစျေးတက်သွားရင်ကောလိုက်တက်မှာလား။ ဒါတွေကို အတိအကျမဟုတ်ရင်တောင်၊ မမြတ်ရင်တောင်၊ ပိုးဆိုးပက်စက်မရှုံးအောင် ကြိုတွက်ထားရမယ်လေ။

ကြက်ဥပြောလို့ကြက်ဥပဲမြင်မနေနဲ့ဦး၊ ဥပမာပေးတာ။ သင်္ဘောဆောက်တာဆိုရင် သံပြားတို့ ဒေါ်လာစျေးတို့ကို ဆိုလိုချင်တာ။

ဒီ Planning အများစုကို Microsoft Project ဆိုတဲ့ Software ထဲမှာ အကုန်လုံးနီးပါးလုပ်လို့ရတယ်တဲ့။ ကျွန်တော်လည်းတစ်ခါမှမစမ်းဖူးသေးဘူး။ စမ်းချင်တယ်ဗျာ။ တစ်နှစ်ရှိပြီ လုပ်ဖို့ကို… အချိန်မပေးနိုင်တာနဲ့ ကျွန်တော့ ကွန်ပြူတာက ၆၄ဘစ် ဝင်းဒိုးစ်ဖြစ်နေတာနဲ့ စမ်းခွင့်မသာသေးဘူး။

စမ်းသုံးဖူးတဲ့လူရှိရင် ဝေငှကြပါဦးဗျာ။

တကယ်တော့ ကျွန်တော်ဧရာဝတီဘုရင်မကြီးဆီမှာ ကြုံခဲ့ လုပ်ခဲ့ရတာလေးတွေ ရေးမလို့ဘဲ… ရေးရင်းနဲ့ အလုပ်စဝင်တဲ့နေ့က အတွေ့အကြုံလေးတွေပါဝေငှလိုတာကြောင့် ဒီ Project Planning/ Project Management ကို ခေါင်းစဉ်မခွဲဘဲ ရေးလိုက်မိတယ်ဗျာ။

တောင်းပန်ပါတယ်။ နောက်တစ်ပိုင်းကျရင် ဧရာဝတီဘုရင်မကြီးမှာကြုံတွေ့တာလေးတွေ သေချာပေါက်ရေးပေးမှာမို့ ဆက်လက်ဖတ်ရှုပေးကြပါလို့ မေတ္တာရပ်ခံအပ်ပါတယ်ခင်ဗျာ။

အားလုံးကို ကျေးဇူးအထူးတင်ရှိလျှက်…

ထိုက်အောင်ကျော်